Beu neu ingat, bahwasajih bahasan nyoe nakeuh meunurot Mazhab Syafi'iy
Puasa atawa Pwasa, poewasa meuasai nibak tuto Bahsa Sanskerta: upvaasa
Puasa nakeuh saboh ibadah nyang geupeubuët lé ummat Islam. Puasa bak ureuëng Islam nakeuh geutheun droë nibak peukara-peukara nyang jeuët keu bateuë puasa phôn teubiët faja sampoë jilôp mata uroë bak watèë meugréb bak buleuën Ramadhan. Puasa bagi ummat Islam nakeuh saboh rukôn nibak limong boh Rukôn Islam.
Laén nibak puasa nyang wajéb buleuën Ramadhan, na cit bak siuroë-uroë ummat Islam geupeubuët puasa sunnat. Buët puasa sunnat nyoë kon rukôn, meunan pih ibadah puasa sunnat nyoë that geupakoë lam agama Islam.
Teujeumah makna atawa areuti puasa lam bahsa Arab nakeuh صوم (shaum) atawa صِيَامٌ (Shiyam), makna shaum atawa shiyam nyan nakeuh theun droë nibak makeuën minom (seumajôh ngon jép ië) seureuta theun hawa nafsu nibak buët laén nyang jeuët keu bateuë puasa, lagèe meuhubôngan lakoë binoë teungoh meupuasa.
Puasa lam makna syari'at nakeuh leubèh nibak puasa lam makna bahsa. Lam syari'at puasa nyan nakeuh theun droë ban lagèe makna puasa lam bahsa, meutamah lom theun droë nibak meukalon peukara nyang geutham lam agama seureuta theun droë nibak kheun-meukheun keu ureuëng laén seureuta rukôn ngon syarat nyang laén. Paneukjih puasa nyoë nakeuh ibadah nyang total lam agama Islam.
Geupham lé ureuëng Islam puasa nyoë saboh ibadah nyang ka na sipanyang seujarah manusia phôn bak Nabi Adam. Puasa nyoe jeuët takheun saboh bagoë ibadah nyang ka na bak awai kön. Bak umat-umat nabi seugohlom Nabi Muhammad ﷺ, ka na geuyue lé Allah keu puasa. Ngon dali wajéb puasa keu ummat-ummat nyang laén lam kitab suci Al-Quran:
يَا أَيُّهَا الَّذِينَ آمَنُوا كُتِبَ عَلَيْكُمُ الصِّيَامُ كَمَا كُتِبَ عَلَى الَّذِينَ مِن قَبْلِكُمْ لَعَلَّكُمْ تَتَّقُونَ
| “ | Hai ureuëng-ureuëng nyang meuiman, ka geupeuwajéb lé Allah ateueh gata bandum puasa, lagèe nyang ka geupeuwajéb di ateueh ureuëng-ureuëng seugohlom gata, mangat jeuët gata mandum keu ureuëng-ureuëng nyang meutakwa (peubuët surôh peujeuôh teugah) | ” |
—Surat Al-Baqarah ayat 183 | ||
Puasa nyoe na meumacam bagoe meunyo takalon rot hukômjih. Na puasa wajéb, sunat, meukrôh, mubah. Leubèh lom na cit puasa nyang hareuëm, lagèë tapuasa bak sa uroe buleuën Syawal (uroe raya puasa), siplôh uroe sampoe lhèë blah uroe buleuën Zulhijjah (buleuën uroe raya haji).
Bak ureuëng Islam nyang jeuët keu ummat Nabi Muhammad SAW puasa buleuën Ramadhan nakeuh saboh nibak limong rukôn Islam. Puasa bagi ummat Islam nakeuh saboh keuwajéban nyang h'an jeuët h'an geupeubuët lé ureuëng Islam inong agam nyang ka mukallaf.
Nyang rôh lam puasa wajéb nakeuh:
- Puasa buleuën Ramadhan.
- Puasa kaôi (nazar).
- Puasa kafarah, peuekeuh kafarah sumpah, poh-seumeupoh, kafarah zihar, dam haji atawa laén nibak nyan.
Puasa sunat seubeutôijih le that, teuma nyoe meupeugah meu padum macam mantong. Puasa sunat nyan lagèe:
- Puasa nam uroe bak buleuën Syawal, seulaén uroe sa.
- Puasa uroe 'Arafah (9 ub Zulhijjah)
- Puasa Asyura (10 ub Muharram)
- Tasu'a (9 ub Muharram)
- Le lom laén
Syarat wajéb puasa nakeuh 5 peukara:
- Islam
- Balèh/ka trôh umu
- Meuakai, kon pungo
- Sanggôp, ék geupuasa
- Gléh nibak haid atawa nifas
Meunyo han sép syarat nyan hana wajéb puasa. Ladôm na cit geutamah syarat, nyakni:
- Sihat, hana sakét brat.
- Mukim atawa geuduek lam gampông tanoh ie. Meunyo musafir hana
Rukôn puasa na 4 peukara:
- Niet bak watèe malam, niet beu na tiep malam puasa.
Niet Puasa lam Mazhab Syafi'i geusyarat beu na tiep malam, meunyö tuwo niet malam puasa nyan h'an sah, tapi wajéb imsak bak uroe nyan ngon wajéb qadha singoh lheueh abéh Ramadhan.
Meuseubab nyankeuh sunat taniet puasa Ramadhan man sibuluen bak malam phôn, deungon cara taikôt/taqlid bak mazhab Malek nyan mangat bèk meukarat 'oh tuwo niet bak malam. Keureuna lam Mazhab Imeum Malék meumada taniet puasa Ramadhan man sibuleuen bak malam phôn [1][2]
- Peutheun droë/imsak nibak peunajôh ngon jeuneujép.
- Peutheun droë nibak jimak/hubungan lakoe binoe.
- Peutheuën droë nibak seungaja muntah.
Na 3 macam sunat lam puasa:
- Peubagah buka puasa meunyo ka yakin trôh watèe ka jilôp mata uroë.
- Peuteulat pajôh sahô, beu mantong lam watèe, bèk sampé ka jitamong watèe jiteubiët faja.
- Tatinggai haba nyang brôk. Bèkkeuh tameusulét, bèk meuupat, bèk ceumarôt, bèk meusumpah palsu.
Na 5 uroë nyang hareuëm tapuasa lam 5 uroë nyan:
- Uroë Raya Puasa bak 1 uroe buluën Syawwal.
- Uroë Raya Haji bak 10 ub Zulhijjah.
- Uroë tasyriq 3 uroë, 11 ub sampé 13 ub Zulhijjah.
Hukôm tapuasa lam uroë nyan nakeuh hareuëm, puasa pih hana sah.
Dali Maseng-masengjih
حديث أَبِي سَعِيدٍ الْخُدْرِيِّ رضي الله عنه، عَنِ النَّبِيِّ صلى الله عليه وسلم، قَالَ: وَلاَ صَوْمَ فِي يَوْمَيْنِ: الْفِطْرِ وَالأَضْحى
أخرجه البخاري في: 20 كتاب فضل الصلاة في مسجد مكة والمدينة: 6 باب مسجد بيت المقدس
Hadih Nabi nibak Abi Sa'id Al-khudriy ra. Nibak Nabi saw. neukheun:" Hana puasa bak duwa uroe, nyankeuh uroe raya puasa ngon uroe raya Adh-ha (uroe raya haji). Hadih nyoe geupeutubiet le Al-Bukhari lam bhaih masalah Leubèh Seumayang lam meuseujid Meukah ngon Madinah. Bab Mesjid Baytul Muqaddis.
قال النبي : ايامُ منَى ايَّامُ اكل و شرب و ذكر الله تعالى (صحيح مسلم)
" Uroe-uroe Mina (uroe tasyrek, 11-12-13 ub Zulhijjah) nakeuh uroe-uroe pajoh makanan ngon jeb ie ngon meuzikir taingat Allah Ta'ala". (Shaheh Muslim)
10 peukara bateuë puasa, nakeuh:
- Jitamong sipeue-peue beunda lam ruhueng badan.
- Jitamong sipeue-peue beunda lam luka/lut bak ulèë nyang trôh bungkôh utak.
- Bôh ubat bak qubul atawa dubur
- Seungaja muntah.
- Jimak, hubôngan badan lakoë binoë.
- Teubiët mani seubab teupèh kulét ureuëng agam ngon ureuëng inong.
- Haid, trôh kuto bak ureuëng inong.
- Nifas, teuka darah lheueh meulahé.
- Pungo
- Murtad
Wikiwand in your browser!
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
