腦葉[歐 1]係廿一世紀神經科學上常用嚟將大腦皮層(哺乳類個腦最外嗰浸神經組織)分區嘅一個方案[1]。腦葉方案建基於大腦皮層上嘅凹凸位:大腦皮層嘅表面有好多腦溝(凹嘅位)同腦回(凸嘅位),呢啲凹凸位令大腦皮層得以有更大嘅表面積,容納更多神經細胞,間接令大腦皮層資訊處理能力提高;唔同腦溝腦回嘅大細不一,例如中央溝係成個人腦最大嘅腦溝之一,喺成年男人當中平均大約有 100 mm 咁上下長,20 mm 咁上下深[註 1][2][3]。而神經科學家用中央溝等最大嘅腦溝腦回,將大腦皮層劃分咗做四大區[4],包括[5][6]:
Quick Facts 腦葉, 生理 ...
Close
本來腦葉嘅分法係純粹建基於解剖學考量(用最大嗰啲腦溝腦回劃分)嘅,但打後嘅神經科學研究表明,腦葉彼此之間喺功能上都有明顯差異[7][8]:例如係枕葉噉,就同視覺資訊嘅處理零舍大關係-枕葉因為疾病或者創傷性損害受損可以搞到個病人就算對眼好地地都變盲;同時,另外嗰三塊腦葉受損通常唔會點影響個人嘅視覺功能[9],而且另外嗰三塊腦葉其中一塊受損嗰陣會出現嘅症狀,又同枕葉受損出現嘅症狀截然不同[10][11]。
順帶一提,小腦查實都有得分做三大腦葉,但啲人講親腦葉通常都係喺度講緊大腦皮層嘅嗰幾個區[6]。