音高
From Wikipedia, the free encyclopedia
音高(粵拼:jam1 gou1;英文:pitch)喺樂理上係一種音樂元素,係每個音符(簡單講就係一下聲)都會具有嘅一個特性。一個音符嘅音高簡單講就係指個音符聽落有幾「高」,而精確啲噉講嘅話,音高查實反映咗一下聲嘅基音頻率-現代聲學嘅研究表明,一下聲嘅頻率愈高,個人聽嗰陣就會愈覺得嗰下聲高音,例如啲人學彈鋼琴第一下會彈嘅中 C 頻率就係 261.626 Hz 左右[註 1][1]。
音高係樂理嘅一個根基概念。噉係因為音高係好多進階啲嘅樂理概念嘅基礎:
- 音程係指兩個音符之間喺音高上嘅差距,例如八度係最常俾人提到嘅一種音程,指兩個音符之間喺頻率(頻率主宰音高)上啱啱好成 2:1 噉嘅比例;而除咗八度之外,樂理上仲有諗好多唔同嘅音程同埋諗呢啲音程分別有乜藝術特性[2]。
- 一隻音階係指一組特定嘅音符,喺五線譜上面跟音高順序排(低至高或者高至低都得),例如 C 大調係世上最常用嘅音階之一,以 C 音做基礎,將組音階裏面嗰啲聲由 C、D、E、F... 噉低至高排,每個音符比打前嗰個高一個大二度[3]。
... 呀噉。
音高感知(pitch perception)就係指人腦感知音高嘅能力,係音樂才能嘅重要一環:經驗表明,技術高嘅音樂人-包括演奏家同作曲家-能夠齋靠聽就講得出一個音符係邊個音高;於是音樂心理學工作者就有喺度研究音高感知能力會受咩因素影響[4],而呢啲研究對音樂教育嚟講相當有用[5]。