行為懲罰
From Wikipedia, the free encyclopedia
行為懲罰(粵拼:hang4 wai4 cing4 fat6;英文:behavioral punishment),通常就噉叫懲罰,喺心理學同動物行為學上係操作制約(operant conditioning)必然涉及嘅一個概念。最基本上,懲罰係指一啲會「弱化」(punish)帶嚟自己嘅行為嘅結果。
舉個例說明,想像依家韞隻大家鼠入個斯金納箱裏面[1],响佢每次撳碌反應槓桿(response lever)嗰時,都會有電流通過佢腳下嘅電網(electrified grid)嚟電佢,令佢有痛嘅感覺;實證嘅研究表明咗,噉做會好快令隻大家鼠唔想再去撳嗰碌反應槓桿-响成個過程當中,「痛」呢個結果係個懲罰,弱化咗「撳反應槓桿」呢樣行為。即係話簡化噉講,懲罰可以想像成「會降低一隻動物做某樣行為嘅動力」嘅後果[2][3]。
對懲罰嘅心理學同神經科學研究有廣泛嘅應用價值:呢啲研究會諗「懲罰嘅過程由邊啲腦區控制」等嘅問題,而呢啲研究會俾人應用喺精神醫學(例:要點樣用藥控制恐懼症呢啲源於懲罰相關功能失靈嘅心理病?)[4]、人工智能(例:點樣教人工智能程式好似真嘅動物噉透過懲罰嚟學習?)[5]同埋執法(例:啲刑罰要點樣設計先可以有效噉弱化「做犯法嘢」呢樣行為?)[6]等嘅多個領域嗰度。