行為強化
From Wikipedia, the free encyclopedia
行為強化(粵拼:hang4 wai4 koeng4 faa3;英文:behavioral reinforcement),通常就噉叫強化,喺心理學同動物行為學上係操作制約(operant conditioning)必然涉及嘅一個概念。最基本上,行為強化係指一啲會「強化」(reinforce)帶嚟自己嘅行為嘅結果。
舉個例說明,想像依家韞隻大家鼠入個斯金納箱裏面[1],响佢每次撳碌反應槓桿(response lever)嗰時,都會有嘢食喺個分配器(dispenser)嗰度跌出嚟;實證研究表明咗,嘢食會令到隻大家鼠更有興致去撳碌反應槓桿,令佢撳得密啲或者撳得大力啲呀噉-喺成個過程當中,「有嘢食」呢個結果係個行為強化,強化咗「撳反應槓桿」呢樣行為。即係話簡化噉講,強化可以想像成「會提升一隻動物做某樣行為嘅動力」嘅獎勵[2][3]。
對強化嘅心理學同神經科學研究有廣泛嘅應用價值:呢啲研究會諗「強化嘅過程由邊啲腦區控制」等嘅問題,而呢啲研究會俾人應用喺精神醫學(例:要點樣用藥控制衝動呢啲源於強化相關功能失靈嘅心理病?)[4]、人工智能(例:點樣教人工智能程式好似真嘅動物噉透過強化嚟學習?)[5]同埋遊戲設計(例:點樣將隻遊戲設計成最能夠強化「繼續玩落去」呢樣行為?)[6]等嘅多個領域嗰度。