想像
From Wikipedia, the free encyclopedia
想像(粵讀:soeng2 zoeng6;英文:imagination)係認知功能嘅一種,指一個認知系統唔靠感官(視覺同聽覺等)嘅輸入,喺自己個心入面組合一啲影像、意念同感覺出嚟嘅能力[1][2],好似係認知心理學上成日研究嘅心像噉,就係指一個人喺冇收到任何實際嘅視覺刺激之下,喺心入面建構一幅影像出嚟。想像呢種認知能力仲可以再細分做由上至下嘅自主想像同由下至上嘅非自主想像:前者包括咗個人有意識噉做嘅發白日夢[3];而後者係指一啲冇辦法自主噉控制嘅想像過程,好似瞓覺嗰陣嘅發夢就係一個例子[4][5]。
想像呢種能力對好多人類活動嚟講都不可或缺:想像係創意嘅基礎-創新定義上就係指創造一啲前所未有嘅事物,所以創新嘅過程必然會涉及作出創新嗰個人喺外界冇嗰件事物嘅情況下,喺腦海入面建構代表佢想創造嗰件事物嘅心智表徵出嚟[6];人類喺日常生活當中做作故仔同講故仔等嘅嘢嗰陣,(就算個故仔唔係虛構嘅)往往需要喺腦海入面想像個故仔所涉及嘅事件,而故仔係人類文化嘅重要組成部份之一[7]。呢類認知過程喺細路仔身上都可以見到:細路仔好多時喺玩遊戲嗰陣會作出想像,例如係用角色扮演嘅方法,扮一啲佢哋想像中嘅角色[8][9]。
喺認知神經科學等嘅領域上,科學家有研究想像嘅神經基礎。例如有研究試過噉做:佢哋搵咗班受試者返嚟,一路要一班受試者做用到心像嘅作業(喺腦海入面想像一啲影像),一路用架生監察住佢哋嘅視覺皮層(大腦皮層主管視覺資訊嗰忽)嘅活動;結果發現,研究者可以靠淨係睇視覺皮層嘅活動,分辨到一個受試者喺度想像緊邊一幅影像-即係話呢幾個區喺度幫手做心像嘅過程[10]。