化學
From Wikipedia, the free encyclopedia
好多人嗌化學做「中心科學」(central science),噉係因為化學喺概念上處於好多領域嘅中間。好似係化學同物理學以及生物學之間嘅啦掕噉:物理學研究宇宙嘅基本定律(物理定律),原則上宇宙萬物-包括物質同唔係物質嘅嘢-都會跟從呢啲定律,亦即係話化學嘅研究對象冚唪唥都會守物理定律,所以化學知識需要建基喺物理學上,例子有用量子力學解釋一啲原子層面嘅現象(化學反應涉及原子之間交換電子)[4][註 1];另一方面,生物學研究嘅係生命,已知嘅生命全部都係由物質組成嘅-生物學研究嘅嘢冚唪唥都要守某啲化學上嘅法則,所以生物學需要用到化學上嘅知識(生物化學)了解生命嘅某啲特性,例如係研究碳水化合物等生命必需嘅化合物嘅合成過程噉[5]。總括嚟講,化學局部建基於物理學,又擔當「做生物學嘅基礎一部份」嘅角色,概念上位於呢兩個領域嘅「中間」[2]。
除咗理論研究之外,化學知識仲相當有實用價值,例如化學工程(chemical engineering)就係工程學當中專門用化學知識嚟設計人造系統嘅子領域,包括會用化學上嘅知識嚟合成好多對現代社會嚟講好有用嘅材料。化學咁有理論同實用價值,於是就廣泛噉畀人視為現代科學嘅重要一環[6][7]。