亞摩尼亞
化合物 / From Wikipedia, the free encyclopedia
氨(粵拼:on1),又叫做氨氣或者阿摩尼亞,係氮同氫嘅化合物,分子式係NH3。佢喺室溫下呈氣態,無色兼帶有強烈而刺激嘅氣味,密度細過空氣,易溶落水,但唔容易解離,佢嘅水溶液係弱鹼性。
氨對陸上生物來講係相當之重要,因為佢係所有食物同肥料嘅重要成份,重係所有藥物嘅成份。雖則氨有咁重要而又廣泛嘅用途,但係佢既帶有腐蝕性,亦都有害。2006年,全球就生產咗大約十四億六千五百萬噸氨[1]。
商業上,都會經常叫氨做「脫水氨」。呢個叫法所強調嘅係氨呢種物質係冇水喺裏頭嘅。氨嘅沸點係−33.34℃,故此液態氨就一定要儲存喺高壓,或者低溫嘅環境。而佢嘅汽化熱都算幾高,即係話如果佢已經係液態嘅話就唔會咁易變返氣態,所以氨可以裝喺普通嘅燒杯同埋放入通風櫃道處理。而「氨水」其實就係氨溶液。