Ospeałe
From Wikipedia, the free encyclopedia
L'Ospeałe (anca Ospedałe) el xe un istitusion par l'asistensa sanitaria in xenere costituia da un grupo de edifisi co un personal spesiałixà chel fa cure e medicaménti par tratar xente (i pasiénti) colpisa da małani gravi.
Ai giórni de ancuo i ospeałi i xe de sòłito tirai su e mantegnui da governi, asociasion par schei o miga par schei, conpagnie par sigurar ła sałude, o de carità, anca grasie a donasion. Durante ła storia, parò, i ospeałi i gera spéso organixai e gestidi da órdeni rełigióxi o personagi o cavi generóxi. A ła stésa maniera, i ospeałi de ancuo i xe direti e dotai da xente de profesion come dotori, chirughi, e infermieri, méntre inte ła storia, st'òpwra qua ła gera più fata da móneghi o vołontari.
I primi ospeałi i xe nasui drénto ténpli, in Egito, Mexopotamia e Oriénte. Sta roba ła xe da atribuir al fato che spéso i pasiénti i se fidava ai dei par eser guarìi, anca se drénto ai ténpli no ghe gera miga un'organixasion da ospeal e ła medexina ła se fondava su pensieri chei gaveva baxe de rełigion, o anca magia. Ipocrate de Coo el xe stà el primo a darghe qualcosa de sientìfego a ła medexina: łu el pensava che bexognava che eła, come siénsa, ła gavése baxe de oservasion e spiegasion łòxica.
Inte i ténpi antighi speso, parò, ła medexina ła xe 'ndada vanti a èser cołigada a ła rełigion. El xe anca grasie a sta roba che inte el consegio de Nicea (325) i ga stabiłì che ła Ceza ła fuse de giuto ai pòari e ai małai: intrà i Cristiani, sto pensièr de far da sustégno el gera xà prexente, basta véder ła paràboła del bon samaritan. A ła fin tuto el ga contribuio a crear łe organixasion ospeałiere monàsteghe, baxe par i ospeałi moderni