మహేల జయవర్ధనే అంతర్జాతీయ క్రికెట్ సెంచరీల జాబితా
From Wikipedia, the free encyclopedia
మహేల జయవర్ధనే విశ్రాంత శ్రీలంక క్రికెటరు, శ్రీలంక జాతీయ క్రికెట్ జట్టు మాజీ కెప్టెన్. దేశం సృష్టించిన అత్యుత్తమ బ్యాట్స్మెన్లలో ఒకరిగా అతన్ని అభివర్ణిస్తారు. [1] [2] టెస్టుల్లో శ్రీలంక తరఫున అత్యధిక పరుగులు చేసిన ఆటగాడు జయవర్ధనే. సహచర శ్రీలంక ఆటగాడు కుమార సంగక్కర అతనిని అధిగమించాడు. మహేల 35 సెంచరీలు చేశాడు. [3] అతను తన వన్డే ఇంటర్నేషనల్ (వన్డే) కెరీర్లో 19 సెంచరీలు సాధించాడు. శ్రీలంక తరపున అత్యధిక పరుగులు చేసిన నాల్గవ ఆటగాడు. [4] 2014 నవంబరు 9న, అతను భారతదేశంపై తన 17వ వన్డే సెంచరీని సాధించాడు. సచిన్ టెండూల్కర్, సనత్ జయసూర్య, రికీ పాంటింగ్, కుమార సంగక్కర తర్వాత వన్డే ఇంటర్నేషనల్స్లో 12,000 పరుగులు చేసిన 5వ ఆటగాడిగా కూడా అయ్యాడు. అతను ట్వంటీ 20 ఇంటర్నేషనల్ (T20I) మ్యాచ్లలో కూడా దేశం తరపున అత్యధిక స్కోరర్గా నిలిచాడు, ఒక సెంచరీ చేశాడు. [5] జయవర్ధనే ఇంటర్నేషనల్ క్రికెట్ కౌన్సిల్ (ICC) వరల్డ్ వన్ డే ఇంటర్నేషనల్ టీమ్కి కెప్టెన్గా ఎంపికయ్యాడు. 2006 ICC అవార్డులలో కెప్టెన్ ఆఫ్ ది ఇయర్గా ఎంపికయ్యాడు. [6] అతను 2007లో విస్డెన్ క్రికెటర్లలో ఒకరిగా గుర్తింపు పొందాడు.[7] మరుసటి సంవత్సరం ICC ప్రపంచ టెస్టు జట్టులో సభ్యుడు. [8]
జయవర్ధనే తొలి టెస్టు మ్యాచ్ 1997 ఆగష్టులో భారత్తో జరిగింది. ఇందులో శ్రీలంక జట్టు 6 వికెట్లకు 952 పరుగులు చేసి ప్రపంచ రికార్డు సృష్టించింది. [9] 1998 జూన్లో న్యూజిలాండ్పై ఆడిన నాల్గవ మ్యాచ్లో అతను తన తొలి టెస్టు సెంచరీ సాధించాడు. [10] 2001 సెప్టెంబరులో బంగ్లాదేశ్పై అతను సాధించిన 150, శ్రీలంక ఆటగాడు చేసిన అత్యంత వేగవంతమైన టెస్టు సెంచరీ. [11] అయితే, అతను 150 పరుగులకు చేరుకున్న తర్వాత రిటైర్ కావడంతో ఈ ఇన్నింగ్స్ అసాధారణంగా ముగిసింది.[N 1] [15] 2006 జులైలో దక్షిణాఫ్రికాపై జయవర్ధనే అత్యుత్తమ ఇన్నింగ్స్ ఆడి, 374 పరుగులు చేశాడు. సనత్ జయసూర్య సృష్టించిన 340 పరుగుల రికార్డును అధిగమించి, శ్రీలంక బ్యాట్స్మన్లలో అత్యధిక వ్యక్తిగత స్కోరు సాధించాడు. [16] ఇది టెస్టు క్రికెట్లో నాల్గవ-అత్యధిక స్కోరు, [17] అలాగే అతను సహచరుడు కుమార సంగక్కరతో కలిసి స్థాపించిన ప్రపంచంలోని అత్యధిక టెస్టు భాగస్వామ్యం-624 పరుగులలో భాగం. [18] జయవర్ధనే తన కెరీర్లో మొత్తం 34 సెంచరీలు సాధించాడు, కుమార సంగక్కర తర్వాత శ్రీలంక ఆటగాడు చేసిన రెండో అత్యధిక సెంచరీల సంఖ్య అది. [19] ఈ ఏడు సందర్భాల్లో అతను 200 కంటే ఎక్కువ పరుగులు చేశాడు. కుమార సంగక్కర తర్వాత శ్రీలంక ఆటగాడు చేసిన అత్యధిక డబుల్ సెంచరీల సంఖ్య ఇది. [20] శ్రీలంక తరఫున ట్రిపుల్ సెంచరీ చేసిన ముగ్గురు ఆటగాళ్లలో అతను కూడా ఒకడు; మిగిలిన ఇద్దరు జయసూర్య, సంగక్కర. [21]
జయవర్ధనే 1998 జనవరి 24న జింబాబ్వేపై వన్డేల్లో అడుగుపెట్టాడు. ఒక సంవత్సరం తర్వాత 1999 జనవరి 23న ఇంగ్లాండ్పై తన మొదటి సెంచరీ సాధించాడు [22] అతని టెస్టు సెంచరీల వలె ప్రసిద్ధి చెందనప్పటికీ, శ్రీలంక తరపున 19 వన్డే సెంచరీలు చేసాడు. జయసూర్య 28, సంగక్కర 21, దిల్షాన్ 20 తరువాత అతనిదే అత్యధిక వన్డే శతకాల సంఖ్య. [23] 2007 జూన్ 10న, జయవర్ధనే 2007 ఆఫ్రో-ఆసియా కప్లో కెప్టెన్గా ఉన్న ఆసియా XI జట్టు కోసం 107 పరుగులు చేశాడు. [24] అదే మ్యాచ్లో అజేయంగా 139 పరుగులు చేసిన మహేంద్ర సింగ్ ధోనీ, జయవర్ధనే ఆసియా XI తరపున సెంచరీ చేసిన ఏకైక ఆటగాళ్లు. [25] 2011 క్రికెట్ ప్రపంచ కప్ ఫైనల్ మ్యాచ్లో భారత్పై అజేయంగా 103 పరుగులతో జయవర్ధనే క్రికెట్ వరల్డ్ కప్ ఫైనల్లో సెంచరీ చేసిన ఆరో ఆటగాడిగా నిలిచాడు.[N 2] అయితే, శ్రీలంక ఆ మ్యాచ్లో ఓడిపోయింది. ప్రపంచ కప్ ఫైనల్లో ఓడిపోయిన మ్యాచ్లో శతకం చేసిన తొలి బ్యాటరతను.[27]
జయవర్ధనే 2006 జూన్ 15న ఇంగ్లాండ్పై T20I రంగప్రవేశం చేసాడు. 2010 మే 3న జింబాబ్వేపై తన మొదటి సెంచరీని సాధించాడు [28] టీ20లో సెంచరీ చేసిన నాలుగో ఆటగాడు జయవర్ధనే, అలా చేసిన తొలి శ్రీలంక ఆటగాడు. [29]