Acula marina
From Wikipedia, the free encyclopedia
L' Acula marina (Larus michahellis) hè un acellu chì face parte di a famiglia di i Laridae. Ind'è l'adultu, u spinu è l'ale sò grisge. E patte sò gialle. U bizzicu hè giallu. L'ochji sò chirchjati rossu. Ci hè puchissimu dismurfisimu sessuale. I ghjovani sò piu bruni, cù u bizzicu più scuri è e patte à spessu rusuline. L'acula marina hè alta 58-68 cm. A so apertura alare hè 130-160 cm. Pesa trà 700 è 1300 grammi.
| |||||
---|---|---|---|---|---|
Larus michahellis | |||||
Classificazione scentifica | |||||
Regnu | Animalia | ||||
Divisione | Chordata | ||||
Classa | Aves | ||||
Ordine | Charadriiformes | ||||
Famiglia | Laridae | ||||
Generu | Larus | ||||
Nome binuminale | |||||
Larus michahellis Naumann, 1840 | |||||
L'acula marina hè prisente annantu à u litturale è tutte l'isule di l'area di u Mare Terraniu, ma dinù annantu à u litturale atlanticu, da u Maroccu à a Brittania. Difatti, l'acula marina hè u più acellu marinu cumunu in l'areale di u Mare Terraniu, incù guasi 120 000 coppii arrighjunati in u mediterraniu occidentale.
L'acula marina era in traccia di sparisce à u principu di u seculu XX, ma dipoi qualchì dicenniu, a so populazione hà crisciutu di manera impurtanta, à tal' puntu chì 'ssa spezia hè cunsiderata qualchì volta cum'è una spezia troppa abbundente è priculosa per l'altre spezie. Difatti, l'acule marine anu cumincitatu dipoi parechji anni à arrighjunisce si ancu in e cità è vicinu à i fiumi.
L'acula marina manghja picculi pesci, piulaconi d'acelli è cadaveri. Hè cacciadore è piscadore. Purtroppu, 'ssu acellu hè statu capace di cambià u so modu di nutrisce si, andendu ancu à circà u so cibu in i rumenzuli. Si cunsidereghja ch'ellu hè 'ssu cambiamentu chì hà incausatu a crescita recente di a populazione d'acule marine.
L'acula marina hè stata cunsiderata frà pocu cum'è una spezia distinta è sputica. Innanzi, era classata in a spezia 'Larus cachinnans'. Da u puntu di vista di a sistematica, ci sò trè sottuspezie d'acule marine:
- Larus michahellis michahellis
- Larus michahellis lusitanius
- Larus michahellis atlantis