Places de soberanía
From Wikipedia, the free encyclopedia
Places de soberanía ye'l términu históricu col que se denomina dende'l sieglu XIX a los territorios españoles asitiaos nel norte d'África, en contraposición a les árees que constituyíen el protectoráu español de Marruecos. Na actualidá, esta nomenclatura sigue utilizándose pa la identificación de les islles y peñones frente a la mariña norte de Marruecos, pero non pa referise a Ceuta y Melilla.
Históricamente, les places de soberanía yeren cinco (sobrevivientes de les antigües places fuertes d'África), subdividíes davezu ente les denominaes places mayores y les places menores. Les actuales Ceuta y Melilla yeren les mayores y les isles Chafarinas, les isles Alhucemas y el peñón de Vélez de la Gomera yeren les denominaes menores.
Amás de les anteriores, la islla de Perexil, un castru despobláu asitiáu cerca de la península Tinxitana, a pocos metros de la mariña marroquina, foi l'oxetu d'una confrontación ente España y Marruecos en 2002, y foi frecuentemente calificáu como una plaza de soberanía. L'estatus nun se sabe con claridá, yá que formalmente nun pertenez a nengún de los Estaos y anguaño ye de facto una terra nullius, debíu en parte al alcuerdu amenáu ente Marruecos y España, por aciu el cual llegóse al resolución de que na islla nun habría nin presencia militar nin nengún símbolu de soberanía.[1] De forma similar, la islla de Alborán tamién foi equivocadamente calificada como plaza de soberanía, una y bones alministrativamente forma parte del términu municipal de la ciudá andaluza d'Almería.