Operación Pilar Defensivu
From Wikipedia, the free encyclopedia
La Operación Pilar Defensivu[9] (o Columna de Nube[10]) foi una operación militar llevada a cabu poles Fuercies de Defensa d'Israel (IDF n'inglés) na Franxa de Gaza, empecipiada'l 14 de payares de 2012 col asesinatu d'Ahmed Yabari, xefe de la caña militar gazatí de Hamás y concluyida el 21 del mesmu mes[11][12][13] col alcuerdu d'un altu al fueu. El periodu previu a esta operación tuvo marcáu por un intercambiu de mutuos ataques de respuesta israelo-palestinos.[14]
Operación Pilar Defensivu | |||||
---|---|---|---|---|---|
Parte de conflicto entre Gaza e Israel (es) y conflictu israelín-palestín | |||||
Fecha | 14 payares 2012 → 21 payares 2012 | ||||
Llugar | Franxa de Gaza - Distritu sur d'Israel | ||||
Coordenaes | 30°40′N 34°50′E | ||||
Causes |
Según Israel: Defensa ante previos ataques israelinos contra los sos civiles. | ||||
Resultáu | Alcuerdu d'altu al fueu. | ||||
Belixerantes | |||||
| |||||
Comandantes | |||||
| |||||
Baxes | |||||
| |||||
[editar datos en Wikidata] |
Según el gobiernu israelín, empezó como respuesta al llanzamientu de más de cien cohetes Qassam mientres un periodu de 24 hores,[15][16] l'ataque de combatientes gazatíes contra unu de los sos vehículos de patrulla militar dientro de les llendes israelines[17] y la detonación d'un artefautu esplosivu improvisáu (IED n'inglés) cerca de los sos soldaos nel llau israelín del túnel que pasa so la barrera de Cixordania.[18] Según ellos, los oxetivos de la operación consistíen en detener el llanzamientu de cohetes dende la Franxa, que amontárense fuertemente nos díes previos a la incursión militar[19] y llindar les capacidaes d'organizaciones palestines como Hamás.[20]
El gobiernu de Hamás negó ser l'agresor, y fixo valir el so derechu a defender a los sos ciudadanos contra'l bloquéu de la Franxa de Gaza y la ocupación de Cixordania y de Xerusalén Este. El so ministru d'Asuntos Esteriores declaró: «Si Gaza nun ye un llugar seguru, les vueses ciudaes tampoco la serán».[21][22][23] Coles mesmes, culparon al gobiernu israelín de la medría de la violencia, acusando al so exércitu d'ataques contra civiles gazatíes nos díes previos a la operación.[22]
Trés díes depués del empiezu de les hostilidaes, Israel llanzara un total de 750 ataques aéreos y los combatientes palestinos habíen disparáu 650 cohetes.[24] Mientres tola operación, les IDF aseguraron atacar más de 1500 llugares de la Franxa,[25] ente los qu'incluyíen danzaderes de cohetes, depósitos d'armes, instalaciones gubernamentales y bloques d'apartamentos.[26] Funcionarios de Gaza aseguraron que 133 palestinos morrieren nel conflictu: 79 combatientes, 53 civiles y un policía,[27] ente qu'otros 840 seríen mancaos. Munches families fueron movíes de los sos llares.[28][29] Delles baxes palestines produciéronse de resultes d'errores nel llanzamientu de los sos propios cohetes que cayeron dientro de la Franxa.[30] Ocho palestinos fueron executaos por miembros de les Brigaes de Ezzeldin Al-Qassam acusaos de collaborar col enemigu.[31]
Dende los primeros díes de la ofensiva, sol impulsu del presidente d'Exiptu, Mohamed Morsi, asocediéronse les xuntes diplomátiques d'altu nivel en El Cairu pa buscar una solución negociada al conflictu y detener la esguilada de violencia.[32] El 21 de payares de 2012, la secretaria d'estáu de los Estaos Xuníos, Hillary Clinton, y el ministru d'Asuntos Esteriores d'Exiptu, Mohamed Kamel Amr, anunciaron un altu'l fueu. Tres una primer fase de cese de los ataques militares, siguiría-y una segunda na que s'axustaríen les condiciones que daríen pasu a la tregua permanente.[33]
Ente que Irán, Rusia, Exiptu, Turquía y distintos países árabes y musulmanes condergaron l'ataque israelín, Canadá, Alemaña, Reinu Xuníu, Estaos Xuníos y otros países occidentales espresaron el so sofitu a dereches d'Israel a defendese a sigo mesmu o condergaron los ataques con cohetes de Hamás contra'l so territoriu. El Conseyu de Seguridá de les Naciones Xuníes celebró una sesión d'emergencia pero nun tomó nenguna decisión al respeutu.[34]