Colonies y protectoraos británicos
artículu de llista de Wikimedia / From Wikipedia, the free encyclopedia
Les Colonies y protectoraos británicos fueron territorios qu'a nivel global tuvieron sol dominiu del Imperiu británicu. La fundación del Imperiu británicu a finales del sieglu XVII ye considerada'l puntu de partida de la evolución territorial del Reinu Xuníu. De magar, munchos son los territorios que tuvieron sol control del Reinu Xuníu o de los sos estaos predecesores.
Cuando se formó'l Reinu de Gran Bretaña en 1707 por aciu la unión de los reinos d'Escocia y el d'Inglaterra, les posesiones coloniales d'ésti pasaron al nuevu estáu. De forma similar, cuando se formó'l Reinu Xuníu de Gran Bretaña ya Irlanda en 1801 por aciu la unión del Reinu d'Irlanda al de Gran Bretaña (ver Acta d'Unión (1800)), el control sobre les posesiones coloniales d'esti postreru pasaron al estáu socesor. Nel so conxuntu estos territorios son conocíos como l'Imperiu británicu. Cuando una gran parte d'Irlanda llogró la independencia (ver Estáu Llibre Irlandés), los otros territorios del Imperiu permanecieron sol control del Reinu Xuníu (dende entós denomináu Reinu Xuníu de Gran Bretaña ya Irlanda del Norte).
Dende 1714 hasta 1837 el tronu británicu taba amestáu al del Reinu de Hannover, un estáu nel norte del Sacru Imperiu Romanu Xermánicu, que los sos líderes yeren tamién duques y eleutores del reinu. Sicasí, esto yera una simple unión personal na cual Hannover caltenía la so independencia política, polo cual nun se consideraba como parte integrante del Imperiu británicu.
Dellos países o dominios del Imperiu británicu llograron la independencia de forma socesiva a principios del sieglu XX. Nos 20 años que siguieron a la Segunda Guerra Mundial, desmantelóse la mayor parte del Imperiu restante, empezando cola independencia de la India y de Paquistán en 1947. L'últimu territoriu significativu en desafiase del Imperiu británicu foi Hong Kong, trespasáu a China en 1997.
Munchos de los antiguos territorios del Imperiu británicu son miembros de la Mancomunidá de Naciones, quince de los cualos (tamién conocíos, xunto col Reinu Xuníu, como Reinos de la Mancomunidá) caltienen a los monarques británicos (anguaño, la reina Sabela II) como xefes d'Estáu. Estos tamién ostenten el títulu de “Xefes de la Mancomunidá de Naciones”, anque solo trátase d'un títulu personal y simbólico, pos tolos miembros tienen corones nacionales totalmente separaes ya independientes del Reinu Xuníu. Esta disposición constitucional nun representa nin un real, nin una continuación teórica de la dominación británica sobre cualesquier de los otros reinos; los miembros de la Mancomunidá de Naciones (incluyendo los Reinos de la Mancomunidá) son estaos de plena soberanía.