Candidatures a los Xuegos Olímpicos de 2008
From Wikipedia, the free encyclopedia
Diez ciudaes presentaron la so candidatura a los Xuegos Olímpicos de 2008 al Comité Olímpicu Internacional (COI). El Comité preseleccionó cinco d'éstes —Beixín, Toronto, París, Osaka ya Istambul— d'ente les cualos foi Beixín la que resultó vencedora. La capital de la República Popular China convirtiós'asina na tercer ciudá d'Asia n'entamar esti eventu tres Tokiu (1964) y Seúl (1988). La so propuesta cuntó col sofitu de la mayor parte del COI, incluyendo al so entós presidente Juan Antonio Samaranch, y tuvo considerada como la favorita dende'l principiu.[1]
Dempués de la evaluación téunica de los diez candidatures orixinales, les primeres cinco ciudaes fueron preseleccionaes el 28 d'agostu de 2000, convirtiéndose en candidates oficiales. Les otres ciudaes aspirantes —Sevilla, L'Habana, Bangkok, Kuala Lumpur y El Cairu— fueron refugaes. Darréu, la Comisión d'Evaluación del COI encamentó como "escelentes opciones" a Beixín, París y Toronto, que se convirtieron asina nes principales candidates a la eleición. Beixín partió con ventaya gracies al fuerte sofitu del so Gobiernu, l'afitamientu de China como potencia mundial y el fechu de presentar candidatura polos Xuegos Olímpicos de 2000 que perdió por tan solu dos votos.[1] Sicasí, la so candidatura tamién foi cuestionada pola situación de los derechos humanos nesi país y el Parllamentu Européu pidió que nun fora escoyida.[2]
Beixín foi escoyida sede de los Xuegos de la XXIX Olimpiada na 112º Sesión del COI celebrada en Moscú'l 13 de xunetu de 2001. La so candidatura llogró mayoría absoluta na segunda ronda de votaciones.[1]