Wladimir Semjonowitsch Wyssozki
From Wikipedia, the free encyclopedia
Dr Wladimir Semjonowitsch Wyssozki (russisch Владимир Семёнович Высоцкий, wiss. Dransliterazioon Vladimir Semënovič Vysockij; * 25. Januar 1938 z Moskau; † 25. Juli 1980 z Moskau) isch e russische Schauspiiler, Dichder und Sänger gsi.
Zwar het s staatlige Melodija-Leibel im Wyssozki sini Blatte verleit, aber dr Liedermacher isch für e sowjetisch Staat en üsserst unbekweeme Sänger und Dichder gsi. In sine Lieder het er au über Theme gsunge, wo s offiziell in dr Sowjetunion gar nit gee het: Brostituzioon, Verbräche und Antisemitismus. Dr Wyssozki isch au hüte no e feste Begriff z Russland und gältet dört as dr grösst Liedermacher im 20. Joorhundert.
Wil e Hufe vo sine Lieder wäge iirem kritische Inhalt vom offizielle Leibel nit veröffentligt worde si, häi d Lüt Doonbandufnaame vo sine Konzärt noch em Samisdat-Brinzip verbräitet und si häi in Millione im ganze Land kursiert. Dr Wyssozki het vor allem vo sine Film- und Theaterangaschemänt gläbt.