D Opere am Gansmäärt z Hamburg
From Wikipedia, the free encyclopedia
D Opere am Gansmäärt z Hamburg isch s erste und vo 1678 bis 1738 s wichdigste bürgerlig-stedtische Theater im dütsche Sproochruum gsi. Es isch am 2. Januar 1678 iigweit worde. Es het zwäiduusig Blätz ghaa und isch gröösser gsi as alli zitgenössische Theater. Vo 1722 bis zur letschte Säson im Joor 1738 het dr Georg Philipp Telemann s Operehuus gläitet. 1765 isch es abgrisse worde, wo s scho lengerei Zit leer gstande und baufellig gsi isch. An sim Blatz isch s Dütsche Nazionaltheater baut worde, wo dr Gotthold Ephraim Lessing vo 1767 aa drei Joor lang as Dramaturg gschafft het bevor s iigangen isch.
Mit em Huus am Gansmäärt si d Nääme vo wichdige dütsche Opere-Komponiste verbunde: Georg Bronner, Johann Philipp Förtsch, Johann Wolfgang Franck, Christoph Graupner, Georg Friedrich Händel, Reinhard Keiser, Johann Philipp Krieger, Johann Sigismund Kusser, Johann Mattheson, Georg Caspar Schürmann, Georg Philipp Telemann und Johann Theile. Au e Hufe dütschi Dichder, wo im früeje 18. Joorhundert as Librettiste berüemt worde si, hänge mit em Theater zämme, drunder dr Joachim Beccau, Friedrich Christian Bressand, Heinrich Elmenhorst, Barthold Feind, Heinrich Hinsch, Christian Friedrich Hunold, Johann Ulrich König und dr Christian Heinrich Postel.