Heresii
en Ussaag oder Leer, wo im Widerspruch zu chirchlig-religiööse Glaubesgrundsätz stoot / From Wikipedia, the free encyclopedia
Heresii (vo altgriechisch αἵρεσις haíresis, dytsch Wahl, ‚Aaschauig‘, ‚Schuel‘)[1] isch im ängere Sinn en Ussaag oder Leer, wo im Widerspruch zu chirchlig-religiööse Glaubensgrundsetz stoot. Im witere Sinn chan e Heresii e Leer, Mäinig, Doktriin, Ideologii, Wältaaschauig oder Filosofii si, wo vom Anerkennte abwiicht. E Hereetiker isch e Verdräter von ere Heresii.
Alternatiiv reedet mä au vo Heterodoxii (vo ἑτεροδοξία heterodoxia, dytsch abwiichendi, verschiideni Mäinig),[1] Chetzerei oder Irrleer.[2][3]
E Gegebegriff isch Orthodoxii (Rächtglöibigkäit). E Leer oder Lääbensform cha brinzipiell nume relatiiv zun ere andere – wo als orthodox beurdäilt wird – as heretisch bezäichnet wärde.[4]
Dr Begriff Heresii wird vor allem in dr katholische Chille brucht, aber es git en au im Kontext vo dr orthodoxe, protestantische bzw. evangelische Chille und mit Bezuug uf s Juudedum, dr Islaam und e baar anderi Religioone. Vo Hereetiker muess mä d Schismatiker underschäide, wo sich zwar von ere bestimmte Beweegig oder Chille abspalte, aber käni Leere usbilde, wo vo deene iire Doktriine wääsentlig abwiiche.